Ministeran’ny Fampianarana Ambony sy Fikarohana Ara-Tsiansa (CSO)

Tontosa soa aman-tsara nandritra ny herinandro lasa teo ny Filankevitry ny Fitarihana Ara-tsiansa (CSO) nataon’ireo Tale Jeneraly sy Talen’ny Ivon-toeram-pikarohana 8 eo ambany fiahian’ny Fitaleavana Jeneralin’ny Fikarohana Ara-tsiansa ao amin’ny Ministeran’ny Fampianarana Ambony sy ny Fikarohana Ara-tsiansa. Nandritra izany fivoriana izany no navoitra ny tatitra momba ny asa vita tamin’ny taona 2025 sy ny vinavinan’ireo tetikasa ho an’ny taona 2026.

         Notanterahina teny amin’ny efitra fivoriana ao amin’ny Fitaleavana Jeneralin’ny Fikarohana Ara-tsiansa, Tsimbazaza, ny 20 novambra 2025, teo anatrehan’ny Minisitry ny Fampianarana Ambony sy ny Fikarohana Ara-tsiansa, Pr RAVONIMANANTSOA Ndaohialy Manda-Vy, ny fizarana sy fifanakalozana.

         Ny tatitra sy ny adihevitra dia nifantoka tamin’ireo vokatra azo ampiharina avy amin’ny fikarohana, izay manampy mivantana ny olona ifotony sy mampiroborobo ny toekarena malagasy.

         Nanamafy ny Minisitra fa manana andraikitra lehibe amin’ny fampandrosoana ny Firenena ny fikarohana, ary nanentana ireo ivon-toeram-pikarohana hanolotra mazava ireo vokatra efa azo ampiasaina mba hoentin’ny mpanapakevitra hamaliana ny filàna eo amin’ny sehatry ny fampandrosoana maharitra.